الأهلي فوق الجميع

الأهلي فوق الجميع

عبارة تسير غضب غير الأهلاوية و بعض من الأهلاوية فبمجرد سماعها تحس بنبرة

استعلاء وتكبر وغطرسة وتضايق وتتسائل إزاي يعني يبقي الأهلي فوق الجميع ومنهم مصر؟

في الواقع أيام ما كنت أهلاوي متعصب كنت ببقي مضايق من العبارة دي لأنها بتثير

الكراهية والحقد علي النادي اللي بشجعه لغاية ما سمعت الأستاذ حسن المستكاوي

ورجعت بالذاكرة لمواقف وحللتها لقيت الموضوع غير كده تماما

فالأهلي فعلا فوق الجميع لكن مين هم الجميع؟!!

الجميع يراد بيهم كل من ينتمي إلي الأهلي من لاعبين وأعضاء وأعضاء مجلس إدارة

ومعناها من حيث التطبيق كما يأتي:

أولا:لو تعارضت مصلحة النادي مع مصلحة أي فرد منتمي إلي الأهلي فإن مصلحة النادي

تقدم وفي أمثلة كتيرة تدل علي الكلام ده منها

1- في سنة 1992 كان حال الأهلي زي الزفت كنا بنتغلب من الزمالك رايح جاي ومسك مجلس

اإدارة المرحوم صالح سليم بعت لحسام ولإبراهيم وهما في أوج تألقهم في سويسرا

رجعوا بعد ماحسام كان هيروح علي ما أتذكر أودينيزي الإيطالي أو لاتسيو

ساب الدوري الإيطالي ورجع

2- سيد عبد الحفيظ اعتزل وهو 28 سنة ولو كان خرج من الأهلي للإسماعيلي

مثلا أو بتروجيت كان هيأدي وكان هيبقي كويس ومش بعيد كان ممكن يجيب بطولة

زي إسلام الشاطر

3- هادي خشبة وعماد النحاس نفس الكلام اعتزلوا لأن مصلحة الأهلي في كده يبقي يعتزلو،

ما تتدخلش إنتخابات مجلس الإدارة يا هادي يبقي مش هيدخل مع العلم إنه لو دخل كان هيكسب

ثانيا: الأهلي مش بيقف علي أي لاعب مهما كان والأمثلة عي الكلام ده كتيرة جدا زي حسام

وإبراهيم وكمان هاني رمزي كان طلب منه صالح سليم يرجع لكنه رفض بعد كده حب ينهي

مشواره في الأهلي في 2007 اترفض طلبه ومرورا بأيمن شوقي ومحمد عبد الجليل إللي راحو

الزمالك لعبو موسم واحد بس وبعد كده مفيش حد بيسمع عنهم وبعد كده إبراهيم سعيد اللي مش

لاقي نادي يلعب فيه وياما اعتذر وابدي الندم وأخيرا أحسن حارس في تاريخ أفريقيا عصام الحضري

وفي حادث تاني كان بطله أحمد فليكس كان بيلعب لغانا ماتش والمفروض إنه يرجع عشان يحضر

نهائي البطولة العربية ضد الرجاء المغربي وتأخر عن ميعاد وصوله وصدر القرار

من المايسترو إنه مش هيلعب حتي ولو هنخسر البطولة وإنه هيتحرم من مكافأة الفوز

وبالفعل ملعبش وفزنا بالبطولة

ثالثا: الأهلي هو النجم الأوحد فالكل بيخدم عليه ويعمل ويجتهد لإنجاحه مش زي باقي الفرق

الزمالك مثلا ومحدش يزعل مني لو عمرو زكي ضرب ميشيل هيحايلوه عشان يلعب او

ميدو أو شيكابالا والكلام ده من زمان فاروق جعفر كان بيتشرط عشان يلعب الماتشات

الكبيرة وممكن الأستاذ سبعاوي يصحح لو كنت غلطان لأنه أكتر خبرة مني

فتلاقي اللعيبة بتكره بعض وبتحقد علي بعض بعكس الأهلي

أخرا بيتهيألي الكلام ده هو سر نجاح الأهلي وتربعه علي عرش الرياضة المصرية والأفريقية

وبيتهيألي الكلام ده ما يزعلش أي حد من أحبابنا

وسيظل الأهلي دائما فوق الجميع

الكلام الاستفزازي لا يقبله احد خاصة عندما تكون مسلماً على طول قلبك بيلقط الصح والخطأ وهي كلمة مش صح فالله فوق الجميع ويد الله فوق ايديهم
وهذا يفتح الباب للغير لقول نفس القول فمنذ اليوم الاول لدخول الاخ احمد ابراهيم (كوستا سابقاً) قال ان الاسماعيلي فوق الجميع ليه..كل واحد يساند فريقة بلا استفزاز
لاشك ان الاهلى صرح كبير وهو اكبر نادي في الشرق الاوسط وبين الحين والاخر يطبق المبادئ واحيانا يغمض عينيه عنها وهذا وارد فالقائمون عليه بشر يصيبون ويخطئون
وكما تفضلت الزمالك به مشكلة كبيره في ادارته وهي تمتد منذ فترة طويلة ولم يتمرد فاروق جعفر الا مرة واحدة عندما اراد ان يحترف في كوزموس الامريكي غير كده معظمها افتراءات الصحافة
المهم في الامر حبنا الكبير لبدنا يجب الا يطغى عليه شئ
كلنا وراء المنتخب الصغير غداً والمنتخب الكبير لاحقاً

مبروك فوز الاهلي اليوم ومبروك فوز الاسماعيلي ومبروك ايضا للوافد الجديد الجونة وحظ اوفر لكل الخاسرين في المرات القادمة

أشكرك علي ردك الجميل يا أستاذ سبعاوي بس عشان أهدي النفوس أنا ليا كام ملحوظة

1- أنا وضحت الأهلي فوق مين بالتحديد

2- كل واحد يساند فريقه بلا استفزاز وأعتقد ما حصلش من جماهير الأهلي أو من قلة منها

إنها رفعت علم نيجيريا في المدرجات لما الإسماعيلي خسر البطولة الأفريقية من أنيمبا

النيجيري ولا رفعت علم الجزائر لما خسر بطولة الإتحاد من شبيبة القبائل

ولا رفعت علم السودان لما الهلال خرج الزمالك من البطولة الأفريقية

ولا رفعت علم الأردن لما خرجه الفيصلي من البطولة العربية

فالأفعال الإستفززية بتيجي من الفرق التانية مش من الأهلي

3- كلنا فعلا وراء المنتخبين الصغير والكبير والأهلي أكبر مدعم للرياضة المصرية

الفريق اللي هيلعب النهاردة منه 9 لاعبين من الأهلي والإتحاد الدولي عمل إحصائية

بينت إن الأهلي أكبر فريق من حيث التواجد بلاعبين في البطولة

والمنتخب الكبير من غير لاعيبة الأهلي ما تستبعدش إن فرقة مغاغة تبهدله